நமது கிராமம் குளக்கட்டாகுறிச்சி @வலைப்பூ உருவாக்க முக்கிய காரணம் என்னவெனில்..

குளக்கட்டாகுறிச்சி கிராமம் ~ திருநெல்வேலி மாவட்டம் ~ சங்கரன்கோவில் தாலுகா ~ குருவிகுளம் யூனியன் பஞ்சாயத்து - கழுகுமலையிலிருந்து 08 கி.மீ ~ கோவில்பட்டியிலிருந்து 18 கி.மீ ~ நடுவப்பட்டியிலிருந்து 04 கி.மீ.. 

ஒவ்வொரு நாட்டிற்கும் பல மகத்தான வரலாறு உள்ளது. நாட்டிலுள்ள மாநிலத்திற்கும், மாநிலத்திலுள்ள ஒவ்வொரு ஊருக்கும் பல சிறப்புகள் உள்ளது. அப்படி பார்க்கும்போது நமது குளக்கட்டாகுறிச்சி கிராமத்திற்கும் பல பெருமைகள் உள்ளது.   

இந்த தகவல் தொழில்நுட்ப யுகத்தில் பல்வேறு விதமான வேலை வாய்ப்புகளும், தொழிற்சாலைகளும் உருவாகியுள்ளன. நான் பிறந்தது 1982ம் வருடம். எனக்கு நினைவு தெரிந்த நாள் முதல் நமது ஊருக்கு போக்குவரத்து வசதிகள் அதிகமாக கிடையாது. கல்வி கற்க வேண்டுமென்றால் உள்ளூரில்தான் படிக்க வேண்டும். இல்லையென்றால் வெளியூர்களுக்கு செல்ல வேண்டும். 1987ல் ஊரில் அனைத்து குடும்பங்களும் விவசாய வேளைகளில் மும்முரமாக ஈடுபட்டிருப்பார்கள். ஊரில் என்னைப் போன்ற சிறுவயது இளைஞர்கள் முப்பது பேருக்கு மேல் இருப்போம். எந்தவித சாதி பாகுபாடுமின்றி ஓய்வு ஒழிச்சல் இல்லாமல் நீச்சல், சில்லாங்குசி, கள்ளன்-போலீஸ், கிரிக்கெட், கபடி விளையாட்டுக்கள் விளையாடி ஊரையே அமர்க்களப்படுத்துவோம். அப்போதைய 1988ம் ஆண்டுகளில் ஊரில் கள்ளசாராய விற்பனை அமோகமாக நடக்கும். அதை குடிப்பவர்களை வேண்டா வெறுப்பாக பார்ப்போம். அப்போது தொலைக்காட்சி பெட்டி ஊர் பஞ்சாயத்தில் (மடம்) மட்டுமே இருக்கும். அதில் சினிமா படம் பார்க்க ஊரே கூடிவிடும். அன்றைய காலகட்டத்தில் வருடத்திற்கு ஒருமுறை தமிழகமெங்கும் ஊர் மக்களை சுற்றுலா அழைத்துச் செல்வதற்கு பூசாரி என்பவர் இருந்தார். சுற்றுலா சென்ற காலமெல்லாம் எங்கள் சிறுவயது வசந்த காலங்கள்.

1990களில் விவசாயம் அமோகமாக நடைபெற்றது. நமது ஊரின் தொழிலாளர்கள் தன்னலமின்றி விவசாயம் செழிக்க பாடுபட்டார்கள். நமது ஊரின் ஒவ்வொரு குடும்பத்திற்கும் பல சிறப்புகள், பாரம்பரியங்கள் உள்ளது. ஒவ்வொரு குடும்பத்தின் பாரம்பரியத்தையும் எதிர்கால சந்ததிகள் தெரிந்து கொள்ள வேண்டும் என்பது என்னுடைய மிகபெரிய ஆவல்.

வேகமாக மாறி வரும் இன்றைய சூழ்நிலையில் பல குடும்பங்கள், பல ஊர்களுக்குச் சென்று  குடியேறி விட்டார்கள். வேலை நிமித்தமாக அவர்களால் ஊருக்கு அடிக்கடி வரமுடிவதில்லை. அப்படியே அவர்கள் வந்தாலும், அவர்கள் குடும்பத்திலுள்ள குழந்தைகளுக்கு ஊரை பற்றியும், ஊரிலுள்ள மக்களை பற்றியும் தெரிய வாய்ப்பு குறைவுதான். நமது கிராமத்தைப் பற்றி பல குடும்பளுக்கும், நமது கிராமத்தின் மீது பற்றுதலை உருவாக்குவதே இந்த இணையதளத்தின் முக்கிய நோக்கம்.

நமது கிராமத்தை நான் அதிகமாக நேசிப்பதுபோல, கிராமத்தின் மக்களையும் நேசிக்கிறேன். அதேபோல், நாம் வாழும் இந்த இந்திய தேசத்திற்கும் மகத்தான பல நற்காரியங்களை செய்ய வேண்டும் என்ற எண்ணம் எப்போதும் என்னுள் உள்ளது. சமூக மாற்றத்தின் மீது அதிக ஈடுபாடு உண்டு. ஒரு நாட்டின் முதுகெலும்பே கிராமங்களில்தான் உள்ளது என்று  தேசப்பிதா மாகாத்மா காந்தி கூறியிருக்கிறார். கிராமங்களிலும் காலாச்சாரம், பண்பாடு உள்ளது. இதை வேறு எங்குமே காண முடியாது. நமது கிராமத்திலிருந்து பல பெரிய மனிதர்களும், இப்போதுள்ள இளைஞர்களும் நமது இந்திய தேசத்திற்காக, இந்திய ராணுவத்தில் சேர்ந்து அவர்கள் வாழ்க்கையையே தியாகம் செய்வதை நினைத்துப் பார்க்கும்போது மிகவும் பெருமையாக உள்ளது.

கனகராஜ், கற்பகராஜ், ஹரிகேசவன், விக்னேஸ்வரன், சீனிவாசகன் மேலும் சில பேர் தற்போது இந்திய ராணுவத்தில் பணிபுரிந்து கொண்டிருக்கிறார்கள். நமது கிராமத்தில் பிறந்த சீனிவாசன் நாயக்கர் அவர்கள், இந்திய ராணுவத்தில் 36 வருடங்களுக்கு மேல் பணியாற்றி ஓய்வு பெற்றிருக்கிறார். அவர் ராணுவத்தில் பல முக்கிய பொறுப்புகளை வகித்தவர். தற்சமயம் நமது கிராமத்திலேயே வசித்து வருகிறார். 

ஒரு கொடுமையான விஷயம் என்னவென்றால், மது என்னும் கொடிய அரக்கனின் பிடியிலிருந்து, மது அருந்துபவர்கள் விடுதலை அடைய வேண்டும். தனி மனிதனுக்கு மது எனும் பானம் தரும் இன்பம், கொஞ்சம் கொஞ்சமாக குடிப்பவரையும், அவர்கள் சார்ந்த குடும்பத்தையுமே முற்றிலுமாக சர்வநாசம் செய்து அழிக்கக்கூடியது.

சாதிப் பாகுபாடற்ற கிராமமாக, குளக்கட்டாகுறிச்சி கிராமம் உருவாக வேண்டும் என்பது என்னை போன்ற பல இளைஞர்களுடைய ஆவல்.

இன்றைய சூழ்நிலையில் நமது ஊரிலிருந்து பல இளைஞர்கள் கணிப்பொறி வல்லுநர்களாகவும், பொறியியல் வல்லுநர்களாகவும் உருவாகி இருக்கிறார்கள். அவர்களெல்லாம் சேர்ந்து நமது கிராமத்திற்கு வருங்கால சந்ததிகள் அரசாங்க பதவிகளுக்கு வரக்கூடிய அளவிற்கு கல்வி கற்க நூலகங்கள் கட்டித்தரவேண்டும். ஒவ்வொரு ஏழை மாணவனும் கல்வி கற்கும் பொருளாதாரச் சூழ்நிலைகள் உருவாக வேண்டும்.

நமது ஊரின் ஒவ்வொரு சாராசரி மனிதருக்குள்ளும் இருக்கும் உணர்வுகளை இந்த இணையதளத்தில் கொண்டு வருவது இனிவரும் நாட்களில் என்னைப் போன்ற இளைஞர்களின் செயல்பாடாக இருக்கும்.

இந்த இணையதளத்தை உருவாக்குவது பற்றி நேரிலும், அலைபேசியிலும் சிலரிடம் தொடர்பு கொண்டு பேசியபோது மகத்தான ஒத்துழைப்பு நல்குவதாக உறுதியளித்தார்கள். நான் ஒருவன் மட்டுமே இந்த மாபெரும் பணியை செய்யப்போவதில்லை. ஆர்வமுள்ள அனைவருமே இதில் பங்கெடுத்துக் கொண்டு சீரிய பணியாற்றுவார்கள்.

ஒவ்வொரு குடும்பத்திலுள்ள இறந்து போனவர்களின் புகைப்படங்களை சேகரித்து அவர்கள் நமது கிராமத்திற்கு செய்த நற்க்காரியங்களை அனைவரும் தெரிந்துகொள்ள வகை செய்வது சிறப்புக்குரிய அம்சமாகும். நான் சில பெரியவர்களிடம் அலைபேசியில் அழைத்து பேசியபிறகு.. அவர்களது அனுபவங்களை எழுதத் தொடங்கி விட்டார்கள் என்பது மகிழ்ச்சிக்குரிய விசயமாகும்.

ராஜராஜ சோழன் தஞ்சை பெரிய கோயிலை கட்டியிருக் காவிட்டால்.. அவரது பெருமையை உலகம் அறிந்திருக் காது. சுவாமி விவேகானந்தர் அவர்கள்.. நமது இந்திய தேசத்தின் பெருமையை உலகமறிய செய்திருக்க வேறு யாராலும் அந்த காலகட்டத்தில் முடிந்திருக்காது. இதில் ஒரு சிறப்பு அம்சம் என்னவென்றால், 2013ம் ஆண்டு சுவாமி விவேகானந்தர் அவர்களின் 150 வது பிறந்த வருடமாகும்.

வரலாறு என்பது நமக்கு மிகப்பெரிய படிப்பினையை உணர்தக்கூடிய  பொக்கிஷமாகும். இன்றைய சூழ்நிலையில், பெரியவர்களிடம் அன்பு, பரிவு, பாசம் குறைந்து வருகிறது. இவையெல்லாம் மாறவேண்டும். அடுத்த பத்து, பதினைந்து வருடத்திற்குள் இந்திய அரசாங்கத்தில் பணியாற்றக்கூடிய அதிகாரிகள் உருவாகவேண்டும். படித்து வேலையில் சேர்ந்து பணம் சம்பாதிக்கலாம். பணம் சம்பாதிப்பதையே குறிக்கோளாகக் கொண்டு, நமது கிராமத்தை யாரும் மறந்துவிடக்கூடாது என்பதை உணர்த்துவதும் இந்த இணையதள உருவாக்கத்தின் முக்கிய நோக்கம்.

நமது கிராமத்து பிள்ளைகள் கற்க கூடிய கல்வியானது மனித குல முன்னேற்றத்திற்கும், நாம் வாழும் தேசத்தின் வளர்ச்சிக்கும் உறுதுணையாக அமைய வேண்டும். வெறும் பணம் சம்பாதித்து, ஆடம்பரமாக தனக்காக மட்டுமே வாழும் வாழ்க்கையை நமது கிராமத்து பிள்ளைகள் எண்ணக்கூடாது.

நாம் வாழும் சமூகத்தில் பாறைகளாக புரையோடிப்போன பழமைகளை உடைத்தெறிந்து, புதிய கருத்துக்கள், புதிய சிந்தனைகள், புதிய சித்தாந்தங்களை நமது கிராமத்து இளைஞர்களிடம் ஏற்படுத்த வேண்டும் என்பது இந்த இணையதளத்தின் நோக்கம். நமது ஊரில் உருவாகப் போகும் எதிர்கால சந்ததிகளுக்கு நமது வாழ்க்கை, நமது கலாச்சாரம், நமது பண்பாடு ஒரு முன்மாதிரியாக அமைய வேண்டும் என்பதே இந்த இணையதளத்தின் முக்கிய அம்சம்.

இதைப்போல, நமது ஊர் மக்களின் ஒவ்வொருவரின் மலரும் நினைவுகள் தொடரும்...

செந்தில்குமார்..
குளக்கட்டாகுறிச்சி
 02.09.2012             

அருள்மிகு காளியம்மன் கோவில் வருடாந்திர கொடை விழா..

நான் பத்து வயது சிறுவனாக என்னுடைய வயதினை ஒத்த சிறுவயது பையன்களுடன் ஓடியாடி வீதிகளில் விளையாடித் திரிகையில், காளியம்மன் பெண் தெய்வம் ஒரு கூரை வேயப்பட்ட மண் வீட்டில்தான் சின்னக் கோவிலாக இருந்தது. சில வருடங்களிலே பலம் வாய்ந்த கற்களைக் கொண்டு கட்டப்பட்ட ஓரளவு பெரிய கோவிலாக வடக்கு திசையினை பார்த்தவாறு காளியம்மன் தேவி வீற்றிருந்து ஊரிலுள்ள மக்களுக்கு அருள்புரியத் தொடங்கினார். இந்த பெரிய கோவில் எப்போது எந்த வருடத்தில் கட்டப்பட்டு மஹா கும்பாபிஷேகம் விழா நடந்தது என்பதை கோவிலின் ஏதோ ஒரு இடத்தில் கல்வெட்டாக வைக்கப்படாத காரணத்தால், எந்த வருடத்தில் நடந்தது என்பதை தெளிவாக அறிந்து கொள்ள முடியவில்லை. 1992ம் வருடத்திற்கு உள்ளாகவே நடந்திருக்கலாம் என அனுமானம் செய்ய முடிந்தது. 

ஆண்டுக்கு ஒரு முறை நடைபெறும் காளியம்மன் கோவில் திருவிழா, சித்திரை மாதம் அல்லது ஆவணி மாதத்தில் நடந்து வந்தது. ஒரு குடும்பத்தில் தலைக்கட்டு எனச் சொல்லப்படும் வரி வசூலிக்கப்பட்டு கோவில் கொடை விழா நடத்தப்பட்டது. காளியம்மன் தேவியை சப்பரத்தில் ஊரிலுள்ள தெருவின் வழியாக கொண்டு வருதல், நையாண்டி மேளம் குழுவினர் மேளம் அடித்தல், சப்பரம் வரும் தெற்கு வீதியின் வழியாக மின்விளக்குகள் பொருத்தப்பட்டு மக்களுக்கு அறிவிப்பினை செய்ய ஒலி பெருக்கியினை வைப்பதற்கு என இத்தனை விதமான செலவுகளுக்கும் தலைக்கட்டு வரியிலிருந்தே பணம் எடுத்துக் கொள்ளப்பட்டு செலவுகள் செய்யப்படும். 

நாயக்கர், யாதவர் சமுதாயத்தினர் இருவரும் இணைந்து செயல்புரிந்தே காளியம்மன் கோவிலுடைய வருடாந்திர கொடை விழா நடைபெற்று வருகிறது. யாதவர் சமுதாயத்து வீட்டுப் பெண்கள் கும்மிப் பாட்டு பாடிக்கொண்டே முளைப்பாரி எடுக்கும் நிகழ்வு, அற்புதமான காட்சியாக இருக்கும். பெண் தெய்வங்களை வழிபடும் கோவில் விழாக்களில் முளைப்பாரி எடுக்கும் நிகழ்வானது, திருநெல்வேலி, தூத்துக்குடி, விருதுநகர், தென்காசி மாவட்டங்களில் உள்ள கிராமங்கள், நகரங்களில் நடைபெறும் கோவில் கோடை விழாக்களில் முக்கியமான நிகழ்வாக நடைபெறுவதை அந்த மாவட்டங்களின் வழியாக பேருந்துகளில் பயணம் செய்யும்போது பார்க்கையில் அறிய முடிந்தது. 

தலைக்கட்டு வரியினை வசூலிப்பதற்கு ஐந்து, ஆறு பேர்கள் கொண்ட இளைஞர்கள், பெரியவர்கள் என ஒரு குழுவாக செயல்படுவார்கள். ஊரிலிருந்து வெளியூர்களில் வெவ்வேறு இடங்களில் பணிபுரிந்து கொண்டு வசிக்கும் குடும்ப உறுப்பினர்களிடம் வரியினை வசூலிப்பதற்கு மூன்று பேர்கள் கொண்ட குழுவினர் சென்று வருவார்கள். காளியம்மன் சாமியின் சப்பரம் வீதியின் வழியாக உலா வந்து மறுதினம் மஞ்சள் நீராட்டு விழா முடிந்த பிறகு அன்றைய தினம் இரவு வேளை, சினிமாப் பாடல்களை கொண்டு பாடும் இன்னிசை கச்சேரி விழா நடைபெறும். எனக்கு நினைவு தெரிந்து 2006ம் வருடம் வரையிலும், ஒரு நாள் இரவு இரண்டு சினிமாப் படங்களும், மறுநாள் கரகாட்டம் எனும் நாட்டுப்புறக் கலை நிகழ்ச்சி நடைபெற்றது. 

மெட்ராஸில்..

முப்பது வருடங்கள் முன்பு நடுத்தர குடும்பமாக இருந்தவர்கள், இன்றைய நாளில் நல்ல பொருளாதார நிலையுடன் சிறிய பணக்காரர் எனும் நிலையை அடைந்த பின்பு.. முப்பது வருடங்கள் முன்பு பெரிய பணக்கார குடும்பமாக இருந்தவர்கள் பெரிய கோடீஸ்வரர்கள் எனும் நிலையை அடைந்ததை ஊரிலே கண்முன்னே பார்க்க முடிந்தது. நாச்சியார் அம்மா மகன் ஹரிபாலகண்ணன், இருபத்தி ஐந்து வருடங்களுக்கு மேலே இந்திய நாட்டின் ராணுவத்தில் பணிபுரிந்து கிருஷ்ணகிரி மாவட்டம் ஒசூரில் முப்பது லட்சம் செலவில் வீடு கட்டி குடும்பத்துடன் வசிப்பதை மூத்த அண்ணன் ஹரிகேசவன் நான்கு வருடம் முன்பு சொன்னார். 2011ம் வருடம், டிசம்பரில்.. மெட்ராஸில் சென்ட்ரல் ரயில் நிலையம் முன்புறமுள்ள ராஜீவ்காந்தி மருத்துவமனை அருகிலுள்ள ராணுவ குடியிருப்பில் ஹரிபாலகண்ணன் தங்கி இருந்தபோது, சாலையில் நடந்து வருகையில் இரவு ஏழு மணி அளவில் பார்த்து நலம் விசாரித்தது. எவரிடமும் கடன் வாங்காமல் சம்பாதிக்கும் பணத்தைக் கொண்டு வாழ்க்கை நிம்மதியாக செல்வதாக சொல்ல.. மகிழ்ச்சியாக இருந்தது. இந்த வேளை மேற்கண்ட விசயங்களை சொன்னேன். முகமலர்ச்சியுடன் சிரித்தார்.

2011ம் வருடம்.. விடுதலை வீரன் வாஞ்சிநாதனின் நூற்றாண்டு வருடமாக அமைந்து, டிசம்பரில் முடியும் தருணத்தில் இருந்தது. மாமா ஹரிபாலகண்ணனை சந்தித்து பேசிய பின்பு ஐந்து நாட்களில் தானே புயல் வந்து கடலோர மாவட்டங்களில் பலத்த சேதாரங்களை ஏற்படுத்தி இருந்தது. மருத்துவர்கள் சம்பள உயர்வை வலியுறுத்தி போராட்டங்களை நடத்திக் கொண்டு இருந்தார்கள். மருத்துவமனையில் சிகிச்சை பெரும் நோயாளிகளிடம் மருந்து கட்டும் காம்பவுண்டர்கள் இருபது, முப்பது ரூபாய் என பணம் வசூலித்து வயிறை நிரப்பிக் கொண்டு இருந்தார்கள். ஹரிகேசவன், ஹரிபாலகண்ணன் இருவருடன் பிறந்த இளைய தம்பி கற்பகராஜ். இந்தப் பையனும் இந்திய நாட்டின் ராணுவத்தில் பதினேழு வருடங்கள் பணிபுரிந்து விருப்ப ஓய்வு பெற்று ஊரில் வசித்துக் கொண்டு விவசாயம் செய்கிறார். இரண்டு அண்ணனுடன் பிறந்த இளைய சகோதரி, கற்பகராஜின் அக்கா மணிமேகலை என்பவர் கல்யாணமாகி வெளியூரில் வசிக்கிறார்.

பனிச்சிகரங்களின் சொர்க்கபுரியான காஷ்மீரிலே..

1997ம் வருடம், பசுவந்தனை சாலையில் உள்ள ...மேல்நிலைப் பள்ளியில் காலை வகுப்புகள் முடிந்து மதியத்திற்கு மேலாக விடுமுறை விடுகையில், பத்தாம் வகுப்பு பொதுத்தேர்வுக்கு பாடங்களை படிப்பதற்கு எட்டையாபுரம் சாலையில் தபால் அலுவலகம் அருகிலுள்ள வணிக வரித்துறை அலுவலக வளாகத்தில் அமைந்துள்ள ஸ்ரீவரசக்தி விநாயகர் கோவிலில் அமர்ந்து தமிழ், அறிவியல், கணிதம் போன்ற பாடங்களை படிப்பது உண்டு. அலுவலக வளாகம் பெரிய பெரிய மரங்களுடன் ரம்மியமாக இயற்கையான சூழலுடன் அமைந்த காரணத்தால் ஐந்து, ஆறு பையன்கள் எப்போதும் பள்ளி பாடங்களை படித்துக் கொண்டு இருப்பதை பார்க்க முடியும். எனது அன்புச் சகோதரி எட்டையாபுரம் சாலையில் உள்ள கம்மவார் பெண்கள் மேல்நிலைப் பள்ளியில் ஒன்பதாம் வகுப்பில் சேர்ந்து என்னுடன் பத்தாம் வகுப்பில் படித்துக் கொண்டிருந்தார். வார விடுமுறை தினமாக செண்பகவள்ளி அம்மன் கோவிலுக்கு வரும் சகோதரியிடம் நான் கொடுக்கும் பாடங்கள் சம்பந்தமான வினாக்கள் காலாண்டு, அரையாண்டு பரீட்சைகளில் எண்பது(80%) சதவிகிதம் வந்துவிடும் என்பதால், ஊருக்கு வருகையில் இதனை ஆச்சரியமுடன் பேசுவார். ஸ்ரீவரசக்தி விநாயகர் கோவிலில் படித்த காலங்களுடன் ஒப்பிடுகையில், பொதுத்தேர்வு எழுதிய பின்பு மதிப்பெண்களை பார்த்தபோது நல்ல பலன்கள் கிடைக்கப் பெற்றதை கண்டு வியப்பாக இருந்தது. 

நானூறு மதிப்பெண்களுக்கு பதினோரு மதிப்பெண்கள் குறைவாகவும், ஐநூறு மதிப்பெண்களுக்கு நூற்றி பதினொன்று(111) மதிப்பெண்கள் குறைவாகவும் இருந்தாலும், அதிர்ஷ்டமான மதிப்பெண்களாக இருப்பதைக் கண்டு வரசக்தி விநாயகருக்கு மனப்பூர்வமான நன்றிகளைச் சொன்னது. 1995ம் வருடம் தொடங்கி புதிய நூற்றாண்டு பிறந்த 2000ம் வருடங்கள் வரையிலான காலகட்டங்களில் ஊரிலுள்ள மக்கள் கரிசல் காட்டு மண்ணில் வேளாண்மை செய்வதற்கு உண்டான பருவமழை சரியாக பெய்யாமல் பொய்த்துப்போன சூழலில் பெரும்பாலான குடும்பங்களில் வறுமை வந்து தலைகாட்டியது. வெளிநாடுகளில் வேலை செய்வபர், இந்திய நாட்டின் ராணுவத்தில் பணிபுரியும் குடும்பங்களைச் சேர்ந்த வீடுகளில் ஓரளவு இத்தகைய விவசாய இழப்புகளை ஈடுகட்டி வறுமை இல்லாமல் வாழும் சூழ்நிலை அமைந்தது. 

எனது ஊரிலிருந்து ஏழு கிலோ மீட்டர் தொலைவில் தெற்கு திசையிலுள்ள கழுகுமலை ஊரிலுள்ள அரசு மேல்நிலைப் பள்ளியில் 1997ம் வருடம், ஜூன் மாதம் பதினொன்றாம் வகுப்பில் கணிதப் பாடப்பிரிவில் சேர்ந்து படிக்க வந்த பின்பு அன்புச் சகோதரி கழுகுமலை ஊரில் சங்கரன்கோவில் ஊருக்குச் செல்லும் சாலையில் அமைந்துள்ள கம்மவார் பெண்கள் மேல்நிலைப் பள்ளியில் +1 வகுப்பில் சேர்ந்திருந்தார். இலக்கியம், அரசியல், விளையாட்டு, சினிமா, சமூகம் குறித்தான விசயங்களை நிறைய பேசியது. சகோதரி ராஜேஸ்வரியின் அப்பா கிருஷ்ணசாமி இந்திய ராணுவத்தில் காஷ்மீரின் லடாக் பகுதியில் பணிபுரிகையில் 1983ம் வருடம், மே 12 நாளில் பிறந்ததை சகோதரியின் அம்மா சொல்லி அறிந்தது. 

புகைப்படம்: எட்டையாபுரம் சாலையிலுள்ள வணிக வரித்துறை அலுவலக வளாகத்திற்கு 2021ம் வருடம், மார்ச் மாதம் முதல் தினமாக சென்றபோது ஸ்ரீவரசக்தி விநாயகரை தரிசனம் செய்த பின்பு மொபைலில் எடுத்த புகைப்படம்.

விடாது கருப்பு @மர்மதேசம் டிவி சீரியல்..

கழுகுமலை அரசு மேல்நிலைப் பள்ளியில் 1997ம் வருடத்தின் ஜூன் மாதம், +1 வகுப்பில் கணித பாடப்பிரிவில் சேர்ந்த பிறகு இந்த வருடத்தின் டிசம்பரில் கேபிள் டிவி இணைப்பினை அப்பா ராமகிருஷ்ணன் வீட்டிற்கு கொண்டு வந்தார். வீட்டில் இருந்தது போர்டபிள் கருப்பு - வெள்ளை டிவி. +2 வகுப்பு பொதுத்தேர்வு சமயமாக இந்த சேட்டிலைட் கேபிள் டிவி இணைப்பு பாடங்களை படிப்பதிலே பாதிப்புகளை ஏற்படுத்துமே என்று அப்பாவிடம் சொன்னதற்கு காதில் வாங்கி கொள்ளாது, பெரிய விசயமாக எடுத்துக் கொள்ளவே இல்லை. புதிய புதிய படங்களை பார்ப்பதற்கு நல்ல வாய்ப்பாக இருக்கிற காரணத்தால், மேற்கொண்டு எதுவுமே சொல்லவில்லை. அன்புச் சகோதரியின் வீட்டிலும் சேட்டிலைட் கேபிள் டிவி இணைப்பு வந்துவிட்டதாக சொன்னார். அன்புச் சகோதரியுடன் கம்மவார் பெண்கள் மேல்நிலைப் பள்ளியில் கணிதப் பிரிவில் படிக்கும் ஒரு மாணவியின் உடன் பிறந்த சகோதரனே அருகிலுள்ள வடக்கூர் ஊரில் ஒரு வீட்டினை வாடகைக்கு பிடித்து அங்கு டிஸ் ஆண்டனாக்களை பொருத்தி கேபிள் டிவி இணைப்பினை கொண்டு வந்து ஊரில் பெரிய புரட்சி ஒன்றினை செய்திருந்தார். வெளியுலகம் பற்றி அதிகமாக தெரியாத ஊரிலுள்ள மக்களுக்கு சேட்டிலைட் டிவியின் மூலமாக ஒளிபரப்பாகும் நாட்டு நடப்பு செய்திகளை கேட்டு உலகத்தில் நடக்கும் அரசியல், சமூகம் சம்பந்தமான விசயங்களை தெரிந்து கொள்வார்கள் என மனதில் நினைத்தது. 

ஐந்து, ஆறு மாதங்களில் ஊரிலுள்ள மக்கள் பார்க்கும் பொழுதுபோக்கு சம்பந்தமான விசயங்கள் நேருக்கு மாறாக இருந்தது. குடும்பங்கள் சம்பந்தமான டிவி சீரியல்களே வீட்டிலுள்ள பெண்களிடம் வரவேற்பை பெற்று சினிமாப் படங்களை பின்னுக்குத் தள்ளி இருந்தது. இந்திரா செளந்திரராஜன் எழுதிய "விட்டு விடு கருப்பா" புதினத்தை மையமாக கொண்டு இயக்குநர் சிகரம் என அழைக்கப்படும் கே.பாலச்சந்தர் சாரின் மின்பிம்பங்கள் தயாரிப்பில் உருவான @விடாது கருப்பு "மர்ம தேசம்" டிவி சீரியல் ஸ்ரீமந் நாராயணனின் கடைசி அவதாரமான @கல்கி அவதாரத்தினை பேசும் விதமாக ஒளிபரப்பாகி ஒரு மாத காலத்திற்குள்ளாக அனைத்து தரப்பு ரசிகர்களின் பெரும் வரவேற்பினை பெற்றிருந்தது.

பள்ளிக்கூடம் முடிந்து வீட்டிற்கு வந்த பிறகு @விடாது கருப்பு "மர்ம தேசம்" இந்த ஒரு டிவி சீரியலை மட்டுமே மிகவும் ஆர்வமுடன் பார்த்துவிட்டு +1 வகுப்பு பாடங்களை படிக்கத் தொடங்கிவிடுவது அன்றாடப் பழக்கமானது. பெளர்ணமி நிலவின் பிரகாசமான ஒளி வெளிச்சத்தில் மர்மதேசம் என்ற மிரட்டலான குரலுடன், வெள்ளைக் குதிரையின் கணைப்புச் சத்தமுடன் ஸ்ரீமந் நாராயணின் பத்து அவதாரங்களை பேசும் புகைப்படங்களுடன் டைட்டில் காட்சி ஓடும் இசையினை கேட்பதற்கே பிரமிப்பாக இருக்கும்.

ஓம் நமோ நாராயணா.