கிரிக்கெட் போட்டிகளின் குறிப்புகள்..

குளக்கட்டாக்குறிச்சி ஊரிலிருந்து தெற்கு திசையிலுள்ள கழுகுமலை ஊருக்கு சைக்கிளில் போய் வருவதற்கு பதினான்கு கிலோ மீட்டர் என்பது உடம்பிற்கு நல்லதொரு உடற்பயிற்சி போன்றே இருந்தது. வீட்டிற்கு வந்து இரண்டு மணி நேரம் பாடங்களை நன்றாக படித்ததும் நல்ல தூக்கம் வந்துவிடும். இங்கிலீஷ், அறிவியல், கணிதம் பாடங்களுக்கு முக்கியத்துவம் கொடுத்து வீட்டிற்கு வந்து படிக்கையில் சிரத்தையுடன் படிப்பது. காலை வேளை 07:45 மணிக்கு சைக்கிளில் கிளம்பினால் மெதுவாகச் சென்றவாறே நாற்பது நிமிடங்களில் ஏழு கிலோ மீட்டர் தொலைவிலுள்ள கழுகுமலை ஊருக்குச் சென்றுவிடலாம். கழுகுமலை ஒரு பேரூராட்சி ஊர். ஸ்ரீமுருகப்பெருமான் வீற்றிருந்து அருள்புரியும் கழுகாசலமூர்த்தி எனும் பழமையான, பிரசித்தி பெற்ற கோவில் அமையப்பெற்ற ஊர் எனும் சிறப்பினை உடையது. ஜடாயூவின் உடன்பிறந்த அண்ணன் சம்பாதி முக்திபெற்ற தலம் என்னும் வரலாற்றினை உடையது. ஆடி மாதத்தில் தெற்கு திசையை நோக்கி செல்லும்போது எதிர்காற்று பலமாக அடிக்கும் சமயங்களில், அன்புச் சகோதரி என்னுடைய சைக்கிளில் வருகையில் கூடுதலாக பத்து நிமிடங்கள் என ஐம்பது நிமிடங்கள் ஆகும். 

தென்மேற்கு பருவமழை பெய்யும் காலங்களில் சிற்சில வேளைகளில் சிவகாசி ஊரிலிருந்து வரும் பேருந்தில் சென்றுவிடுவது உண்டு. மாலை வேளை, பள்ளிக்கூடம் முடிந்து வருகையில் பேருந்தில் பயணம் செய்வது கடினமாக இருந்த காரணத்தால், ஒரு குடையை எடுத்துக் கொண்டு சைக்கிளிலே சென்றுவிடுவது பழக்கமானது.

சேட்டிலைட் சேனலில் சினிமாப் படங்களை பார்த்துவிட்டு படங்கள் சம்பந்தமான திரைக்கதை காட்சிகள் எத்தகைய தாக்கத்தினை மனதில் ஏற்படுத்துகிறது என்பதை காட்சிகளுடன் சகோதரியிடம் சொல்லும்போது ஆர்வமுடன் கேட்பார். கிரிக்கெட் போட்டிகள் தொடர்பான கேள்விகளை நிறைய கேட்பார். இந்தியா, பாகிஸ்தான், ஆஸ்திரேலியா, தென்னாப்பிரிக்கா, மேற்கு இந்திய தீவுகள், நியூசிலாந்து போன்ற அணிகளில் சிறப்பாக விளையாடும் பேட்ஸ்மேன்களைப் பற்றி புள்ளி விபரங்களுடன் சொல்லுவது பழக்கமாக இருந்தது. இத்தகைய புள்ளி விபரங்கள் பலவற்றினை மனதில் ஞாபகமாக வைத்துக் கொண்டு கிரிக்கெட் விளையாட்டினை பற்றி புதிய முறையில் பேசுவதை கேட்கும் சகோதரி, என்னுடைய ஞாபக சக்தியினை பாராட்டி பேசுவார். கிரிக்கெட் போட்டிகளை பார்க்கும்போது, பேட்ஸ்மேன்கள் அடிக்கும் ரன்களை ஒரு பேப்பரில் எழுதி வைத்துக் கொண்டு அது குறித்தான விபரங்களை அலசிப் பார்க்கையில், இத்தகைய விபரங்கள் மனதில் நன்றாக பதிந்து விடுவதே புள்ளி விபரங்களை ஞாபகமாக வைத்திருக்க ஒரு காரணமாக இருந்தது. இத்தகைய சூழலில், +2 வகுப்பு பொதுத்தேர்வில் என்னைவிட சகோதரி அதிக மதிப்பெண்களை எடுத்து சாதனை புரிந்ததை கண்டு வியப்பாக இருந்தது.